مكرونة بالوايت صوص (على طريقتي)

مكرونة بالوايت صوص (على طريقتي)

المكرونة:

-200 جرام مكرونة قلم مسلوقة 
- 1/2 كيلو لبن
- معلقتين دقيق كبار
-معلقة واحدة سمن او زيدة (صغيرة)
-ريحان وزعتر وملح وفلفل اسود وتوم وبصل بودر
- 1 جبن كيري او مثلثات

الطريقة:

- نسلق المكرونة نص سلق ( 10 دقايق ع النار )
-للصوص :
نحط معلقة السمن في الحلة ونضيف عليها الريحان والزعتر وبودرة التوم والبصل يشموا النار ميتحمروش وننزل عليهم باللبن ومعاه الجبن والملح والفلفل
نحط معلقتين الدقيق في كوباية مياه وندوبهم كويس ونحطهم ع اللبن بعد مايغلي ونسبهم لحد السمك المطلوب ( ولازم نسيبهم شوية عشان الدقيق يستوي لانه متحمرش في الاول ودي طريقة سهلة للمبتدئين وكمان دايت)

- نحط المكرونة في الصوص ونسيبها على نار هادية 3 دقائق وتبقى كده جاهزة

فضفضة من المطبخ

...................... 

النقط دي الكلام اللي مش عارفه اقوله عشان ابتدي كلامي  

محمد عمل الصفحة دي كهدية لعيد جوازنا وفاجأنى جدا بيها لأنه عرف واتفاجئ زيي اني باحب المطبخ وانه بيطلع مني طاقات مكبوتة وان عمل أكلة بمزاج بمليون أكلة بتتعمل عشان تسد جوع . 

ولأني عارفة ان في برامج طبخ كتير وكمان في صفحات أكل كتير ففكرة صفحة فيسبوك للطبخ والوصفات مكانتش مسيطرة على تفكيري اوي ( الحقيقةأنا نفسي يفتحلى مطعم... أشرف عليه بس طبعا ) 

فياريت أقدر أقدم حاجة تفيدكم ..... وان شاء الله تكون الصفحة مكان لطيف نتعلم فيه من بعض حاجات كتير 

#من_واحدة_دخلت_المطبخ_بعد_ماخلصت_الجامعة 

#الأكل_مزاج 

#الطبخ_من_غير_نفس_عذاب

استنونا

مستينين مننا وصفات لأكلات معينة ؟

كلمونا هنا عاوزنا نكلمكم علي ايه ؟ ولو في اصناف بعينها قولونا و نحاول نعملها سوا 

#مطبخ_ليلى

#مدام_بكيزة_هتطبخلكم

الفكرة و مروة و ليلي و عطية

سنتين جواز

وعروسة جميلة 

وطفلة الناس بتقول عليها لطيفة اسمها ليلي 

فكرت - التاء عايدة علي عطية الزوج - ان افضل هدية

أأقدمها لمروة ام ليلي اني اعملها سوشيال لطيفة تحط فيها

قوائم الأكل و تشارك الناس بحاجة بتحبها :)

هي بتعمل ليا و لليلي أكل هايل

طيب ايه المانع اننا نشارككم بيه

استنونا في المدونة و صفحة فايس بوك و تويتر اكونت و قناة علي يوتيوب فيها فيدوهات

ممكن تكون من انتاجنا في المستقبل ان شاء الله

تابعونا دايما : مطبخ ليلى